Leseprobe aus

Blädderraschle
Im Gedichtband "Blädderraschle"
werden Beobachtungen in vier Kapiteln
‚Wedderwechsel'
‚Iwwerm Haag'
‚Midde unner uns'
‚Im Zaubergaade'
poetisch, satirisch,
kritisch und heiter beschrieben.

Riech, guck, horch

Horch!
Sie zwitschere widder
freehlich klingt s em Ohr
der Winter isch vorbei
sie zwitschere widder
Horch!

Guck!
Sie blieje widder
farwisch springt s end Aare
der Friihling hot oogfonge
sie blieje widder
Guck!

Riech!
Draus em Freie duft s jetzt widder
lieblich steigt s end Nase
der Winter isch vergonge
draus em Freije duft s jetzt widder
Riech!

Riech, guck horch!
Tu' dei Sinne net verschließe
tu' Farwe, Duft un Klong genieße.


Jetzt
uff de Schwelle
vum Winter zum Friihjohr
fiihlsch de Puls vum Leewe
Riech!
Guck!
Horch!


M.K.


Dann wär

wann eener
kumme det
middere
große scharfe
scher
un det sie packe
die alte zepp
un schnippedischnappe
die alte zepp
dann wär
endlich mehr
platz
fer

junge

I.R.

Summer

Middagshitz
flimmert iwwer
Stoppelfelder
geel un satt

Getreidebuschl
enennonner gstellt
schmeiße korze Schatte
koum zum Raschte

sogar de Mucke
isch s zu haaiß
zum Schwärme
Houchsummermiddag


M.K.

Sei groußi Lieb


Er streicht um sie rum
streicht re
iwwer d Aare
iwwers Gsicht
streicht erre
iwwer de Buckl
iwwer s Hinnerdaail

er zeigt sein Fotoapparat
kniet vor sie noo
knipst sie
vun unne
vun owwe
vun rechts
vun links
vun hinne
vun vorne
vun allene Seite

donn steigt er
gonz vorsichtich
uff
sei neiji
Suzuki


M.K.

Zurück