Howwl-Auszug, Kercheuhr
Gun Dach Ihr Leit!

Do binni widder! Un aa des-mool werri mi net iwwer mei Kerch un ihr Chefs auslosse. Des heeder woll geern, dass i mi bei denne aa en d Nessl setz!?

Solong wie em Dorf noch sou viel scheene un wennicher scheene Geschichtlin bassiere, brauch i do net druff zurickgreife. S deet zwar genung zu schreiwe gew-we, awwer noo, i loss mi net vor den Karre sponne.
Desmool hawwi e bsunners scheeni Geschicht zu berichte.

I waaiß net, ob Eich uffgfalle isch, dass desjohr en de Advents-zeit en gonz bsunnerer Chrisch-bååm unsern Dorfmittlpunkt, de Marktplatz, verscheenert hot.
Grouß isch er gwest un graad gwachse. Koi Äschtl, wu aus em Muschter gfalle wär, oofach en Chrischbååm, wie aus em Bilder-buuch.
Iich hab mi noch gwunnert, wu d Gmooi denn woll uffgetriwwe hot. Awwer der Wald vun Eschlbrunn isch grouß und ir-genwu muss des Prachtstick vun Chrischboom jo gstonne sei. Weiter hawwi nix gedenkt. I hab mi oofach en dem Boom gfraait, wie onnere Eschlbrenner aa.
Sogaa donn, wu der Vorstond vum Tennisclub zu unserm Rot-hauschef gonge isch un oogezaigt hot, dass vun denne drei wun-nerscheene Tånne neewem Tennisplatz, wu der Tennisclub gepflonzt un gheegt un gepflegt heet, blouß noch zwuu Tånne iwwerich wäre, hawwi mer nix debei gedenkt.
Der Rothauschef aa net! Deer hot nämlich den Vorstond weitergschickt, weil, wonn oom e Tånne geklaut werd, des e Sach vun de Polizei wär.



Ja un d Polizei hot die Ååzaaig uffgnumme un die Sach isch ihrn Weg gonge.
Bis mer uff em Rothaus gmerkt hot, was do bassiert isch, nämlich, dass d Gmooi heegscht perseenlich der Dieb vun dem Tånnebååm gwest ich, war scho alles zu spät. Doch wonni en die finonziell Lag vun Eschlbrunn denk, donn froog i mi ab un zu gonz leislich, ob Eschlbrunn gar sou arm isch, dass d Gmooi sich de Grischbååm klaue muß?
Do heed i en Vorschlag zu mache. Wie wär's donn, wonn mer den Ortsfunk widder aktiviere deet? Sellemols hewwe sie for alle Gebotsdaagsglickwinsch un schunschtiche Werbedurchsaare Gebühre eigschtriche. Do keed mer sich s gonz Omtsblaad spare.
Sell ware noch Zeite. Erinnert Ihr Eich noch? Un die Junge hewwe des alles net erlebt. Die wisse gar net, was ne do entgonge isch.
Vun denne onnere Verdienschtmeeglichkeite, wu en de Gmooi brochlieje, will i gar net redde.
Wommer alle Gebühremeeglichkeite aus- schepfe deet, deet mer en monche Euro zusätzlich en d Kass krieje.

Um noch emool uff den scheene Chrischbååm zurückzukumme: Mein liewer Tennisclub, isch des net e tolli Sach, wonn e gonz Dorf sich en erre graadgwachsene Tånne fraait?!. E Tånne, wu durch eier Pfleg sou schee gwachse isch! (Na ja, vielleicht wär sie jo aa vun ellooi sou graad gwachse!) Un, Hånd uff's Herz, wer heed donn schun die Tånne beim Tennisplatz gseje? Un vor allem, wer heed sich donn doo dro gfraait.
D Tennisspieler spiele un gucke net uff e scheeni Tånne un de on-nere Leit fällt sou e Tånne doch em Tennisplatz net uff. Heegschtens d Hundebesitzer werre sie vermisse. Awwer zum Booiheewe for d Hund stehne immer noch zwuu Tånne dort rum. Un Zum Nååschritze for d Hund werre jo schließlich zwuu Tånne longe. Wonn net, messe die Hund halt Schlonge steh un warte bis sie drookumme.

Zurück